John 9

Yeisu ehebo mehena gibugibuna iꞌabiye namwanamwa

1Teya hauga ainai Yeisu ilaulau amwahai na towaho ehebo ilobai mamehegibugibuna na hilalabahine. 2Na ana taumulitaone hiꞌita ta Yeisu hipanivilaei, hiwalo, ‘Tauveꞌita, yaiya yana yababa ainaena towaho teina mamehegibugibuna na hilalabahine, iya yana yababa bo tamana na hinana yadi yababa?’

3Eeta Yeisu iwalo aulidi, iwalo, ‘Nigele iya yana yababayena, nuwana tamana na hinana, na hesi mamehegibugibuna hilabahi ta ainaena Yaubada yana paihowa wahiwahiyalana tomowa maudoidi hiꞌita towahone ainai. 4Iya ivetamalegauma yana paihowa tapaihowaidi ahubenaena wuwuna ebe masigili ilaoma nigele teya yaiya howahowana na ipaihowa. 5Eena yau hauganane baleꞌuwai yamiyamiya, yau baleꞌu ana masele.’

6Walo teina iwalowedi iꞌovi na baleꞌu ihowai na tobatoba ipapaihowaine, eena tobatobane ivai ta towahonane mehenane iꞌaꞌabidine, 7na iwalo auli iwalo, ‘Ulau ta Sailowam bwahinane ainai mehemne uuwa’. (Sailowam ana bui Vetamale.) Eeta ilau ta ihuhugune, na mehenane iꞌitanedine, ta ilau gwaipileuyone.

8Na towahonane ana geluwo hiꞌita na hiwalo, ‘Teina nuwana iya tauꞌawaꞌawanoiwa?’

9Na tupwadi hiwalo, ‘Iya ainaede taꞌi’.

Na tupwadi hiwalo, ‘Nigele, teya towaho. Na hesi ana oleya bada dova’.

Na towahonane iwalo, ‘Yau ainaede’.

10Eeta hiwalo, ‘Vedova yede ta mehemwone uꞌiꞌitanedine?’

11Na iwalo aulidi iwalo, ‘Ehebo towaho yehanaede Yeisu, tobatoba ipaihowai na mehegu iꞌabidi, na aliguwai iwalo, “Ulau Sailowam bwahinane ainai mehem uuwa”. Ainaena yalau ta mehegune yauwadi ta yaꞌiꞌitanedine.’

12Eena hipanivilaei, hiwalo, ‘Haidova ainaede?’

Na towahonane iwalo, ‘Nigele yayahanapui’.

Palisiwone nuwanuwadi ginauli teina hihanapui

13Yeisu ahubena tapwalolo ainai towahonane mehena tobatobaena iꞌaꞌabiye namwanamwadine, neta wuwuna towahonane hilauvaiyama Palisiwone aidiyai. 15Na Palisiwone taumehegibugibuwa hipanivilauyowei, hiwalo, ‘Vedova ta mehemne uꞌiꞌitanedine?’

Eena iwalo aulidi iwalo, ‘Yeisu tobatoba ipaihowaidi ta meheguwai iꞌabiꞌabiyedi na weꞌaha ainaena yauuwane, ta meheguwone yaꞌiꞌitanedine’.

16Na tupwadi Palisiwone hiwalo, ‘Iya taupaihowainane nigele Yaubada ainaena, wuwuna ahubena tapwalolo yana loina nigele iyamulitaei’.

Na tupwadi hinage hiwalo, ‘Vedova ta tauyababa veꞌiveꞌilala wahiwahiyalana teina dova ipapaihowaidine? Nuwana nigele howahowana awa?’ Tenem ainai wahei imahalava aidiyai.

17Na hinage Palisiwone mehegibuginane hipanivilauyowei hiwalo, ‘Na owa vedova yam nuwatuwu iya mehemne iꞌabiye maseledine vehabana?’

Na iwalo, ‘Iya tauwalo mahalava ehebo’.

18Na Yudeya babadaone nigele hiyayemidi ebeha towahonane mamehegibugibuna itutubuine na teina taꞌi mehena iꞌitanedine. Eeta tamanawa yo hinanawa hiyogaedima, 19ta hipanivilaedi hiwalo, ‘Ebeha heda teina mehegibugibuna amlalabahine? Na vedova yede ta mehenaone iꞌitanedine?’

20Eena towahonane tamanawa yo hinawa Palisiwone aidiyai hiwalo, ‘Ahanapuiyaꞌo iya moiha natumai na hinage mehegibugibuna alalabahine, 21na hesi nigele ayahanapui vedova ta mehenane iꞌitanedine, na hinage yaiya iꞌabiye namwanamwadine nigele ayahanapui. Ta hola ampanivilaei na ibom vehabana iꞌaubabada, wuwuna bada imwalaꞌiꞌo.’ 22Tamana yo hinana walo teina hiꞌataidi wuwuna yadi tautaubadaone aidiyai himeheuhi. Wuwuna tautaubadaone yadi loina himwauwidi ta ebe yaiya Yeisu iꞌawa Besinanaei iya vada tapwalolowena hisosomanaei. 23Teina wuwuna towahonane tamana yo hinana hiwalo, ‘Ibom ampanivilaei wau bada imwalaꞌiꞌo’.

24Eeta taumehegibugibuwa hiyogaeuyowei na hiwalo auli hiwalo, ‘Havena Yeisu unoꞌonoꞌowei na Yaubada unoꞌowei wuwuna iya ililivahigone na neta towahone ahanapuiyaꞌo iya towaho yababana.’

25Na iwalo, ‘Nigele yayahanapui nuwana iya tauyababa bo nigele. Na neta bada yahahanapuine ebeha meheguwone higibu na iꞌabiye namwanamwadine.’

26Na ainai hiwalo, ‘Hava ipapaihowaine ta mehemwone uꞌiꞌitanedine?’

27Na iwalo, ‘Bada yawalo auligomiuꞌo na nigele alinagu amyabenalei. Hava wuwuna nuwanuwamiu ebeha ambenaliuyoi, nuwana omiu ana taumulitao awa?’

28Tenem ainai hinahinabodai na hiwalo, ‘Owa bada ana taumulitaede na ai Mosese ana taumulitao, 29wuwuna bada ahanapuiyaꞌo ebeha Yaubada iꞌauꞌaubabada Mosese ainai, na towahone Yeisu nigele ayahanapui havaena ilalaomane’.

30Na towahowa aidiyai iwalo, ‘Teina ginauli palipalina wuwuna towahonane mehegu iꞌabiye namwanamwadi na nigele amyahanapui ebeha havaena ilalaomane. 31Na bada tahanapuiyaꞌo Yaubada nigele tauyababa alinadi iyamulimulitaedi, na hesi ebe yaiya Yaubada iveꞌahihiyei yo yana nuwatuwu ipaihowaidi, mata Yaubada towahonane alinana imulitaei. 32Na bada tahanapuiyaꞌo mugai ta wau nigele teya yaiya tayabenalei ebeha taumehegibugibu iyaꞌabiye namwanamwadi. 33Ebe towaho teina nigele Yaubada ainaena, mata nigele howahowana veꞌiveꞌilala teina dova iyapaihowaidi.’

34Ta Palisiwone taumehegibugibune hiwawalo auline hiwalo, ‘Owa tauyababa yam hauga heda ainaena ta wau. Ta ebeha uveꞌitagai yaiya owa?’ Eeta vada tapwalolowena hiheusili ta iꞌaitulu gabaedine.

35Na Yeisu towahowa wasana ibenalei ebeha vada tapwalolowena hiheusiliyaꞌo, ta ibehaei na haugana ilobai iwalo auli iwalo, ‘Yaubada yana Besinana towahona uyemidiyei awa?’

36Na towahowa iwalo, ‘Taubada, yaiya iya ta ainai yayemidi?’

37Na Yeisu iwalo, ‘Towahonane teina taꞌi uvinuvinunuine na baidam amꞌauꞌaubabadane’.

38Ta towahowa iwalo, ‘Bada yayemidiyegoꞌo’, na italumiyahiwa ta ainai ipwapwagogone.

39Na Yeisu iwalo, ‘Yau baleꞌuwai bada yalaomaꞌo ta yaloinaegomiu, ta ebe yaiyadiwo mamehegibugibudi mata hiꞌitanedi, na yaiyadiwo mehedi hiꞌitaꞌitanedi mata higibu’.

40Ta Palisiwone Yeisu yana walo hibenaledi na hiwalo, ‘Vedova, ebeha ai hinage mehegibugibumai, awa?’

41Na Yeisu iwalo aulidi iwalo, ‘Ebe omiu mamehegibugibumiu mata nigele mumuga yababadi alimiyai hiyamiyamiya, na omiu amwalo, ai mehemai aꞌitanediꞌo, ainaena mata yami mumuga yababadi himiya vateyai’.